GRRINTA

bend ki sviri Žminjski val

Javna Proba za EP IiiPij

svibanj16

posted under Koncerti, Pruovi, Snimanje 2. CD-a | Comments Off

Od sad smo dostupni 24/7 (sa dan)

svibanj14

Grrinta je ti zadnji dani zasien utoćala prsti va to buuuuk muore. Smo si napravili i ta biati Oblak ča rošta, oliti Soundcloud. Hitite okolo ča se imamo gore, dok Van ne riva ta novi CD IiiPij, morete ga posluhnut va oblake (se špreamno da ni neko nevrieme ali grašica tamo).
Tamo diesno nasried pišo Grroti i IiiPij, pak morete sve čut jeno za drugon, a morete si i skinut, kalat, ziet (samo ne krast), pak zapeć matere, ali nuone, ali za soedico ča ne znaš ča biš nje reka, a biš jo rad, pak joj za škužo pokloni CeDe, to je odličan line opener!
http://www.soundcloud.com/grrinta

posted under Pruovi, Snimanje 1. CD-a, Snimanje 2. CD-a | Comments Off

Drugi CD – EP ki se zove IiiPij

svibanj14

Alora neko vrieme nas ni bilo aš smo delali vele stvari, neki je samo ša pišat, neki se ša vadit, drugi so pisali pjesme, neki so pršuti rezali. Intantor Grrintavci so vajk radno aktivni. I tako smo rivali i kakouv put zasot is se to liepo snimit, a kad je bilo pruonto se je pojavi naš Sanjin (ki ima Žminjsko srce – ćeš, niećeš!), da ku bimo mi, forši, onako ufalo, odpošti, zasien bez plana teli da nan “Žminjsko srce” izda CD i da ga pokloni sake fameje na žminjšćine. A mi kako veli dobrotvori ki se volimo sien dat za nič smo zajno prihvatili to sjajno idejo (i Dejo je prihvati, ja). I ča sad? Od danas (utorak 14.05.2013.) Žminj je bogateji za još jedan “dugosvirući kolutić”, sirić, oliti CeDe. Sa žminjšćina će kantat ćo. Si ćete ga hvalit, a mi ćemo bit kuntienti.

Pa kad već pitate eko van malo već slovi o ten noven (još je tepal ud friganja), noven…
Ima 6 pjesmic, ča boljeh, ča odličneh. Neke ste već čuli (ku ste pratili našo binsko djelatnost), a neke nikakor niste imeli kade, neke so stare, a neke još stareje.
Pjesma “okosnica” albuma je Istarski pršut, za kojsto nan je Paolo od Pršutani Jelenić reka da ćemo dobit pršut od njega ako napišemo pjesmo za pršut i ku ta stvar fini na radio. Mi smo stvar napravili, stavili na CD i sada ćemo lobirat radio. A ako se ta ciela transkacija ponese kako je ubećano, mi ćemo to pjesmo posvetiti Pršutane Jelenić, a si vide, ni bez vraga. Za tien je tu Priek kunfina, jen življa pjesmica za si naši žminjski kamioništi ki delajo priek kunfina, a jie hi ja dosti. A za šlag na torte se pobrinu naš Ratko i s pjesmicon Duši od čovika je reka jeno velo istino, ali ćete muorat posluhnut sami. Kada smo snimili Grroti (naš 1. CeDe, ku ki ne zna) so nan neke pjesme zustale van CeDeja, pak smo hi eko sad liepo stavili da nan ne bi ča zustalo, a da vi niste čuli. Epsko romantična budnica – Piet besied i španjolsko meksička reggae pjesmica na rubu incidenta Ča, ča, ča će van na prvo uho leć va uho. Zadnja pjesma ča smo stavili na ta IiiPij je jena ča nikakor ni finjena, ali je nismo imeli nikamor za zarivat, pak smo rekli neka ljudi čujo kako naše pjesmi zvučo kad hi tek napravimo, i kad je budemo pokle objavili na sljedećen CeDeje ćete moć čut razliko. Aš sad da je Demo, ča je to Demo, ma!? Za seh Vas ča nas čitate z drugeh kraji svieta ćemo sad ti dani stavit link, da morete posluhnut i Grrintualno. E e, ja, imamo i najvećega!!!  Tekst va novinah, ča zajno skačeš  : )  Tako da ćete muorat proštet našo povijest.

Intantor CeDe je tu, Hvala Žminjskemu srcu, hvala Sanjinu glavnemu uredniku i suradnikon, hvala Dane ča je imela dosta struji za nas (to ti ne zabimo, ćo!), i ja i još, IiiPij sien.  QQ

posted under Naše kanti, Pruovi, Snimanje 2. CD-a | Comments Off

Najavljujemo novi singl

travanj9

Ojla ljudi, ča ste ča, ćo! GRRINTA ni nestala, samo smo se jeno malico zatajili aš smo šli snimat drugi ČeDe. Zasad radnega imena “Drugi”. I samo da znate da smo već snimili već od puol, pak ku ne verujete, da ne buo da sliepimo ćemo ovako kroz inter net najavit novi singl, i mikrospot (to ti je oni spot kad se niš ne miče nego samo sliki gredo, kako slajdšo, ali ono kad se anke čuje kanta kako sviri).
Novi singl se zove “Na ti me” i ku buo se va riede za dan-dva-tri je tu samo za Vas da ga posluhnete, zapoštate i kantate kad van je teško, liepo, grdo, debelo, tanko, ku puše bura ali grad ku pada, vajk će bit štabela kancuonica kojsto ćete si zá rada kantat. Bimo van to kanto bili puštili i prvo, ali smo jo poslali na festival “Andrej Baša i prijatelji” i buduć da mi nismo prijatelji nego Grrinta, i nimamo šoldi, nismo upali a nismo Van jo smeli puštit dok se oni ne spensajo ku će jo, ali ne! Pak ni do sad nan niso javili, a mi drugo ne čekamo nego ćemo Van jo puštit da posluhnete i da nan date suoj penas : )   A dok počekamo ta hit ubajdite par sliki od našega snimanja, a bit će hi još. QQ

Šeko Ekskluziva – Merikane

siječanj5

Na si Tri Kralji nabot 06.01.2012. ćemo imet probe na bine puli Merikan, aš to će nan bit zadnja pruova prvo nego ča suboto počnemo snimat 2. CD va naše fonografije! A kako će hodit va uho ti novi hiti pridi videt pietak na 23:14 z večera. QQ

posted under Koncerti | 1 Comment »

Bartulja 2011 – opet

kolovoz22

Naslov guori Bartulja opet – to bi reć da je zadnji put kad smo triebali sost pada daž do tla, pak nas ni pušto zasost, a sad se šperamo da će bit bolje vrijeme, ku ja, ku ne, mi sopemo, pak kamo puklo da šlo! Kako ča gore se liepo piše, pietak, na dvajsetišiest angošta, jušto na devet ur z večera, sope GRRINTA, Kotkelsi i Lijida Bačić  :)   Se gledamo!

posted under Koncerti | Comments Off

GRRINTA ima 2. rođendan

srpanj26

720 dan pokle ča smo se našli, one mesečeve noći na 1. angošta 2009.-te, GRRINTA ima ruojsni dan, kako mali otročić smo se zatekovali od jene bine do druge, kalili smo se kako ćelik, i znali smo da prit će velik, ta zalet ča smo zieli. Svirili smo nebrojeneh koncerti (aš hi niedan ni broja), snimili i hitili van CD, još svirili, doživjeli smo razne metamorfoze, ali smo zavajk bili i ustali GRRINTA.  Magari kad ste nas pitali zač Grrinta, mi bi najraj rekli: “A zač ne!?” I eko nismo se ni obrnuli štabelo, a već so pasala 2 leta, 2 veeela leta. Deboto smo punoljetni. Za 3. rođendan se šperamo da ćemo delat promocijo novega Albuma, zasad još nima ime, ali pjesme se pomalicon krgajo. Eniho! To nedeljo, na devet i dvajseti dva ur, puli Merikan va Mordore (Žminj) će bit Grrintadanski party. Svi ste pozvani, dobro voljo nosite Vi, a torto nosimo Mi. Pijačo nosi Tina. I naravski dress code: “Manje je više, samo dok je Sexy Disco! ”

I samo za kraj želimo reć da finalmente znamo i mi ča jušto pride GRRINTA.
GRRINTA je stanje duha!!!  QQ

posted under Koncerti | 4 Comments »

Probe kroz leto

srpanj15

Teplo je za vraga, ma to nanke ne muoramo guorit, aš si vi ki nimate klimo znate za ča guorimo. Ku pelješ z klimon va veture špendaš 15% već benzini, a to znači da napraviš 15% kilometri manje, jaaaa. Kroz cielo to vrijeme z Suncen, va naše Garaže je 36°C i do dveh za polnoći je teplo, ma mi ne baciljamo, pridemo, stisnemo zuobi, i delamo pruovi, da budemo pruonti kad pride naš 2. rođendan. A to će brzo, hip ta hip. Rođendan nan je inače na 01.08. pak ćemo Vas avižat na vrijeme kamo da pridete pojest kus torti, do oniput, držte se za jaja, Kuraja!

posted under Pruovi | Comments Off

Merikane 22.04. – GENERALNO TESTIRANJE

travanj18

Liepi naši, pred dva meseca smo Van dali CD, sad je prišla kraj prolića i vireme je od maturanti i fani od GRRINTI. Ta pietak (big frrajdej) ćemo Van povedat ča je bilo torrak pred Vazaan, i ćemo videt ki će nan muorat tornat CD ku se ni štabelo sve pjesme navadi! Ti?  A ti?  Za te ne znan, ali želin verovat da sve znaš! QQ

posted under Koncerti | Comments Off

GRRINTA na Radio Pule

ožujak21

 

hojla, opet smo pozvan va gosti, a ovi put na Radio Pulo, kako gosti va emisijo “Gost iz svijeta glazbe” voditelja Ludvika Slane. Nas je zazva da pridemo reć par besied o našen bende, koncerti i naravno o našen prven CD-e Grroti, za kega se šperamo da Van je već liepo sije va uho, aš će brzo bit ispit od Grrinti kade ćemo provjeravat koliko ste se dobro to navadili kantat, ali nu, to nedeljo na 27 marča na frekvencijah Radio Puli na 13:10 (jeno i deset za puolne) ćete moć posluhnut veselo Grrinto, forši anke ča va živo zakantamo. Posluhnite pak ćete nan znat reć kako je pasalo  : )

posted under Snimanje 1. CD-a | Comments Off
« Older Entries
You need at least one entry in your shoutbox! Just type in a message now and reload, then you should be fine.



Naši kanali YouTube kanal Twitter kanal